علاء البابا على طريق الاحتراف الأوروبي
أعلن لاعب التضامن صور والانصار السابق علاء البابا أنه بطريقه للاحتراف بأحد الأندية الأوروبية دون تحديد اسم النادي او البلد الذي يشارك ببطولاته، وذلك برسالة عبر حسابه الخاص جاء فيها: من أنا و صغير عم بشتغل و إتعب و إحلم بأنه إحترف و إلعب خارج لبنان و بعد اكثر من ١٥ سنة بالملاعب اللبنانية ، ولله الحمد الله أكرمني و يسر لي بأنه إنتقل و إحترف ب أوروبا.
بدي إتشكر من كل قلبي كل شي شخص ساعدني و دعمني لأوصل لهالحلم من ١٥ سنة ل اليوم .. كل مدرب كل لاعب كل اداري كل صديق و أخ كل مشجع و كل محب.
بدي إتشكر أهلي و عائلتي اللي تعبو معي كثير و دعموني بكل الظروف الصعبة اللي مرقت فيها و كانو دائماً السند اللي يخليني كون أقوى.
بدي إتشكر نادي التضامن صور اللي يسر لي الأمور و وافق ع فسخ عقدي معهم قبل إنتهاء الموسم ب شهر ونصف تقريباً لإقدر وقّع خارج لبنان و أخص بالشكر الإستاذ سمير بواب أبو راغد و خيي و حبيبي علي بيطار الغيغز.
شكر كبييير و من كل قلبي ل إخواتي الوكلاء و اللي إلهم الفضل الكبير بعد رب العالمين بانتقالي ل أوروبا ( خيي فراس علي الوكيل العالمي و خيي و حبيب قلبي الكابتن محمد سنتينا).
الحمدلله رب العالمين ع كل الأمور .. ان شاء الله منكون عند حسن ظنكم و إدعو لنا بالتوفيق يا أحباب.
