حوار مع الحكومة اللبنانية

كتب حسن أحمد خليل *

حوار بيني وبين الحكومة..
*حاكم بنك مركزي.. ومدعي عام مالي.. وسفير.. ومختار..

*الحاكم
انا: يقال مختلفين على اسم الحاكم..
هيدا ما بدو هالاسم..
وهيداك عنده تحفظ على هالاسم..
خلاص.. في نقولا بباريس.. ممتاز. خريج البوليتكنيك وHEC. ومدير عام في بنك كريدي اغريكول.. وحاصل على وسام من 3 رؤساء فرنسيين وخبرة 40 سنة.. ومسيحي.. شو بدكم بعد؟
*هم: شو بدنا بعد؟ نقولا؟ انسى.. خلينا نجيبك انت الشيعي حسن خليل.. ارحم.. ارثوذكسي.. يا لطيف.. شو علاقته بمجد لبنان؟؟ انسى.. طيب في كاثوليكي اسمه جورج ت.. .. انسى.. سكر الموضوع.. بدنا ماروني بالعظم.
انا: طيب بركي عمل رياض سلامة تاني؟
*هم: مش مهم.. يا ريت اسمه شربل كمان..

*المدعي العام المالي
انا: طيب.. طيب.. خلاص. خلينا نحكي بالمدعي العام المالي..
*هم: نعم.. مطروح اسم فلان؟
انا: مين؟؟ مين؟؟ الله اكبر.. خلينا بالحالي ارحم.. شو رأيكم في قاضي ممتاز اسمه عمر ك..؟؟
*هم: سني؟ سكر الموضوع.
انا: ليش؟ كتير آدمي ومستقل وفهمان، وما بيرد على حدا..
*هم: آدمي ومستقل وفهمان وما بيرد.؟ 4 مصائب بواحد؟ انسى.. بعدين بدنا واحد هيك على ذوقك اسمه حسين. وافضل اذا علي.. يعني من عظام الرقبة.. ويكون زار الديوانية عدة مرات، وقدم الولاء.. وبتعرف الطائفة بخطر وجودي اذا المعلم ما كان راضي.. بتأثر على الحدود… مش ضروري يكون كتير فهمان. المهم يفهم علينا، ويكون متوافق مع الحاكم المركزي اللي جايي على ذوقنا.. ما تنسى حيكونوا سوا بلجنة التحقيق الخاصة. الخاصة فينا يعني.. فهمت؟

*السفير
انا: طيب مين جاي سفير بهالعاصمة؟؟
*هم: العمى شو دمك تقيل.. هاي الحكومة اعلنت حتجيب بكل المناصب حسب الكفاءة والمعايير.. متل الرز والسكر والطحين..*
انا: بس سمعنا بإسم السفير فلان..
*هم: نعم. شو إعتراضك. وشو بيشكي؟ فهمان، وما في فرصة الا بيزور الديوانية.. والزعيم بيحبه..خلاص.. هيدي بتكفي.. والحكومة بتكون وفت بوعودها.. قلنا لك معايير..*
انا: طيب ليك؟ انا طامح من زمان اخدم بلدي. شهاداتي من اهم جامعات العالم. وخبرتي تقريبا 50 سنة. وعلاقات عربية ودولية..
واسمي حسن واحمد وخليل.. يعني من عصب الطائفة..
هل ممكن، كوني دمي تقيل ولساني طويل، وهيك بتخلصوا مني، تعينوني مثلا، سفير لبنان بلندن، متل ما ترامب عين لبناني سفير اميركي ببيروت… والمنصب لشيعي.. يعني ظابطة بالمعايير من كل الجهات..
*هم: نعم نعم.؟ معقول انت واحد مجنون الى هاالحد. لا حبيبي مش ظابطة الامور وما بحياتها حتظبط.. قال ظابطة قال.. اولا. عم تقرب على المحرمات والخطوط الحمر.. وثانيا ما دمت بعدك بهالطبع الزفت والراس العنيد، وما حتتغير، ومصرّ تجلّس ذنب الكلب، وما قمت بزيارة استغفار واستسماح، وانت اصلا مش حتزور، انسى الموضوع.. مختار بضيعتك شحور ما حتعمل..*

*مختار*
انا: لا يا عمي مختار بشحور؟ اعوذ بالله.. في المختار حبيبنا وابن عمنا. وبعده الوحيد صاحبنا. بدكم تخلفونا معه..

خلاص.. نرجع لنقولا الارثوذكسي..
*هم: ابدا سكّر الموضوع.. بدنا ماروني*
انا: طيب عمر السني..
*هم: انسى. بدنا شيعي*
انا: طيب انا؟ ما في مجال؟ سفارة لندن؟
*هم: انسى. انت واللي متلك خط احمر.. حتشوف عجايب بعد من حكومة الشفافية والتعيينات حسب المعايير.. والمقادير والكراعين والفوارغ.. بس انتظروا..*

* تجمع استعادة الدولة