ما حدا يشمت بحدا..
في ابو عمر السني كتير كتير..
وكذلك في كثير من ابو عمر المسيحي والشيعي والدرزي وكل الطوائف..
وطبعا في ابو عمر خاص للمتغيرين. عفوا التغيريين..

هل بتتذكروا كيف كانت طائرة خاصة تطير بحوالي ٢٠ نائب من احزاب السيادة من كل الطوائف، على عواصم العالم.. ما كانوا ينطروا ابو عمر يجي لعندهم. هني بيطيروا بطيارة خاصة ليجتمعوا مع ابو عمر “الخواجا”. اي الأجنبي..
ابو عمر الشيعي بيزور واحد بس، وبعدها بيصير في تكليف شرعي او فتوى دينية، “بيفوت على النار اللي بيخالفها” ..
ابو عمر الدرزي قناته واحدة فقط، وهو بيتكفل بالأمر..
اما ابو عمر المتغيريين التغيريين، فكيف ما بدو ابو عمر يتغيروا بيتغيروا.. مع الممانعة وضدها..
مع السيادة وضد السياديين..
ضد رياض سلامة والمصارف بس سكوت صارم ومطاعم على غذاء..

نعم. يا لبنانيي ما تضحكوا. هيدول هم قياداتكم وزعمائكم واحزابكم ونوابكم..

مرة اجتمعوا في الطائف واخذ كل واحد شنطته، ورجعوا انتخبوا وصاروا حبايب.. جمعتهم الشنطة والكرسي، وكل واحد بيعرف عن شنطة التاني..
مرة شفتهم شخصيا في مؤتمر الدوحة. شفت كيف كل واحد عم يفاوض، وعينه اكثر للمفاوضة على حجم شنطته.. ورجعوا انتخبوا ووحدة وطنية شعارها الشنطة والكرسي .
شفتهم فورا بعد الرجوع الى بيروت كلهم في طائرة واحدة. طلعوا على الطيارة صيصان صغار.. ووصلوا على بيروت وامام الطيارة كانت مواكب سيارات عتمة، ومرافقين وسلاح “حربية”، وكانهم رايحين على معركة.
راحوا عالدوحة صيصان منتوفة، ووصلوا على بيروت طواويس منفوشة.. مع شنط وكراسي..

كيف فيك تقنع اصغر لبناني بيشقى بعرق جبينه، انو هو اشرف من اهم زعيم لبناني ملياردير وبعمره ما اشتغل غير بسرقة الدولة وسرقة اللي بينتخبوه..
كيف؟
ابو عمر ونص..
لو ما في لبنانيين اذلال رخيصين، ما بيشبعوا حتى لو صاروا رؤساء وزعماء وبكاوات وشيوخ، ما كان بيكون في ابو عمر سني ومسيحي وشيعي ودرزي، وكلهم ما بيعرفوا الله والمسيح ومحمد..
كل عام وانت بخير يا لبناني. “بطل الحرب وبطل السلم وقلهم انك لبناني”.
بطل البطن والرز والهز والطز..
وبكرا انتخبهم وانبسط انو حضر عزاء او فرح معك.. وقعد على طاولتك..
الذليل العبد ما بيتغير..

يا صفية.. نحن ليش ما زارنا بعد ابو عمر؟

٢ كانون الثاني ٢٠٢٦
حسن أحمد خليل